කවුද මේ Social Media Influencers කියන්නේ?

 කවුද මේ Social Media Influencer කියන්නේ?

🏷️සමාජයේ ජීවත් වන පුද්ගලයන්ගේ මතවාද සකස් කිරීමට දායක වන පිරිස් ජනමත නායකයින් හෙවත් Public Opinion Leaders වශයෙන් හදුන්වා දීම සිදු කළ හැකියි. ආගමික නායකයින්, දේශපාලකයින්, සමාජ ක්‍රියාකාරී පිරිස් ආදීන් එම භූමිකාව තුළ දී හදුනා ගත හැකිය. ඔවුන් විසින් සාමාන්‍ය සන්නිවේදන ක්‍රියාවලියේ දී මෙන් ම ජනමාධ්‍ය සහ නව මාධ්‍ය ආදී වූ සන්නිවේදන මාධ්‍ය මගින් ජනමත සකස් කිරීමට කටයුතු කරයි. එබැවින් ජනමතය සකස් කිරීමට මොවුන් බලපෑම් සිදු කරන බැවින්, බලපෑම් කරන්නන් වශයෙන් ද මෙම පිරිස් හදුන්වා දිය හැකිය.

කාර්මික විප්ලවය සමග ගොඩනැගෙන ජන මාධ්‍ය භාවිත කරමින් ජනමත ප්‍රධානීන් විසින් පුද්ගලයාගේ මතය නිර්මාණය කිරීමට කටයුතු කරන ලදි. නමුත් අන්තර්ජාල මාධ්‍යයේ ආගමනය සමග ගොඩනැගෙන තවත් ජනමත ප්‍රධානීන් වර්ගයක් වශයෙන් Social Media Influencer හදුන්වා දීම සිදු කළ හැකිය. මොවුන් සමාජ මාධ්‍ය වේදිකා මගින් පුද්ගලයා වෙත බලපෑම් කිරීම සිදු කරයි. 

ජනමත ප්‍රධානීන් විසින් පුද්ගලයාගේ දේශපාලනික, ආර්ථික, සමාජීය, ආගමික ආදී විවිධ අංශයන් සම්බන්ධයෙන් පවතින මතවාදයන් සකස් කරයි. උදාහරණයක් වශයෙන් ආගමික නායකයින් විසින් ආගමික කටයුතු තුළ දී සිය ආගමික ප්‍රජාව තුළ පවතින මතවාදය සකස් කිරීමට කටයුතු කරයි. එකී සන්දර්භය මත හිදිමින් සමාජ මාධ්‍ය වේදිකා තුළ හමුවන බලපෑම් කරන්නන් හෙවත් Social Media Influencers පිළිබඳ ව මෙම කෙටි ලිපියේ දී අවධානය යොමු කෙරේ.

නව මාධ්‍ය ප්‍රභේදයක් වශයෙන් සැලකෙන සමාජ මාධ්‍ය යනු, ගිණුමක් නිර්මාණය කිරීමෙන් අනතුරුව එම ජාලයට අදාළ පරිශීලකයන් සමග සන්නිවේදනය තුළින් ගොඩනැගෙන ජාලයයි. ශ්‍රී ලංකාවේ ඉහළ භාවිතයක් පවතින සමාජ මාධ්‍ය වේදිකා (Social Media Platforms) වශයෙන් මුහුණ පොත (Face Book), වට්සැප් (Whatsapp) සහ යූ ටියුබ් (You Tube) පවතින බව සංසංඛ්‍යාලේඛන වාර්තා පෙන්වා දෙයි. (TRCSL Report) මෙම සමාජ මාධ්‍ය වේදිකා මත ක්‍රියාත්මක වෙමින් විවිධ පුද්ගලයින් විසින් විවිධ අන්තර්ගත නිර්මාණය කරමින් සිය ජනප්‍රියතාව වර්ධනය කරගෙන සිටියි. එහි පවතින සුවිශේෂීත්වය වන්නේ එම පුද්ගලයාගේ අන්තර්ගත ලබා ගැනීම සදහා විශාල ග්‍රාහක පිරිසක් මිතුරන් වශයෙන් ඔහුගේ හෝ ඇයගේ ගිණුම තුළ සිටීමයි. අද වන විට මුහුණු පොත සහ යූ ටියුබ් වැනි සමාජ මාධ්‍ය වේදිකා ආශ්‍රිත ව මෙවැනි Social Media Influencers බහුල ව හදුනාගත හැකිය. මොවුන් සමාජ මාධ්‍ය තුළ හිමිකරගෙන සිටින ඉහළ ජනප්‍රියතාව හේතුවෙන් මොවුන්ගේ සමාජ මාධ්‍ය ගිණුම් හරහා විවිධ සන්නාම අලෙවිකරණ කර්යේ නියැලෙයි. එසේම විවිධ සමාජමය අවස්ථාවන්හි දී සිය සමාජ මාධ්‍ය ගිණුම් හරහා සිය මතවාදය ඉදිරිපත් කරමින් විවිධ අන්තර්ගත ඉදිරිපත් කිරීමට මොවුන් කටයුතු කරයි. එමනිසා යම් ආකාරයකට ජනමත සැකසීමේ කර්යේ මොවුන් නියැළෙයි.

🖋️ දමිත් සුමේන්ද්‍ර පෙරේරා