We can do it.....

මිනිස් සිත හරි පුදුමාකාරයි. සතුට සේම දුක ද එක සේ විඳ දරා ගන්නට හැකි ශක්තියක් සිතකට තිබිය යුතුය. දුක වේදනාවක් නම් අප ළං කර ගත යුත්තේ සතුට. සතුට නිකම්ම ලැබෙන දෙයක් නොවන බව ද සත්‍යයකි.
එහෙනම්, අප සතුට කරා යා යුත්තේ කුමන ආකාරයෙන් ද? සතුට ඇති තැන නිරෝගී සුවය ද නිරෝගී සුවය ඇති තැන පරමායුෂ ද පරමායුෂ ඇති තැන ශක්තිය ද ශක්තිවන්තයෙකු ද බිහි වන්නේ ය. එලෙසින්ම මේ සියල්ල ඇති මිනිස් සිතට ලැබෙන්නේ අපමණ අගයක් බව ද අප වටහා ගත යුතුය. එහෙම බලන විට මානව දිවිය නිරෝගීමත්ව තබා ගැනීමට අපට අවශ්‍ය කරන ප්‍රධාන සාධකවන් අතරින් ව්‍යායාමය ප්‍රධාන තැනක් ගනී. මිනිසාගේ කායික මෙන්ම මානසික සුවය පවත්වාගෙන දී ව්‍යායාම මගින් ලබා දෙන්නේ නොමඳ අත්වැලකි. එලෙසින් වෙනස් වන ජීවන රටාවකට අනුගත වෙමින් මානවයාට අවශ්‍ය ව්‍යායාමය ලබා දීමට මේ වන විට ව්‍යායාම මං තීරූ හා ජිම් මධ්‍යස්ථාන අද වන විට ලෝකය පුරා එකසේ පැතිර තිබේ. ඒ නිසා ජිම් ගැන කතා කරන්නට අද බාල, තරු ණහා වැඩිහිටි පුද්ගලයින් ද යොමු වෙයි.
ලෝකය පුරා ජනප්‍රියත්වයක් ලබා ගැන ඇති මාතෘකාවක් වන ජිම් ගැන අප ලබා ඇති දැනුම කෙබඳු ද ? නිවැරදිව අප ජිම් මධ්‍යස්ථානයක ක්‍රියාවලිය වටහා ගෙන තිබෙනවා ද ? නැතිනම් අපි ජිම් භාවිතා කරන්නේ අනිත් අය කරන්නන් වාලේ කිරීමට ද ? ඒ හින්දා මේ ප්‍රශ්න අප, අපෙන්ම ඇසිය යුතුයි.
හැබැයි මේ ලෝකේ තියෙන හැම ප්‍රශ්නයකටම පිළිතුරක් තියෙනවා වගේම, මේ ප්‍රශ්නයටත් නිවැරදි පිළිතුරක් සොයා ගත යුතුයි. එහෙම නම් අප කළ යුත්තේ දන්නා දැනුමැත්තෙකුගෙන් පිහිට පතා , මේ ප්‍රශ්නයට නිවැරදි පිළිතුරක් ගැනීමයි. ඈ ඒ සඳහා ඉහළ සුදුසුකම්ලාභිනියක හමු වූවාය. වෘත්තියෙන් වෛද්‍යවරියක වු ඇනා කරලිනා අද මාලඹේ ඊදාහ ෘදජ ආයතනයේ ප්‍රධානියා වෙයි. මේ උක්ත කරුණු අරඹයා දිගහැරෙන්නේ ඇගේ විවරණය යි.
ඔව්. මුලින්ම මම ඈ දෙවනි ගමනේ මංගල කලාපයට මගේ සුභ ප්‍රාර්ථනා කරනවා, ලංකාවේ කාන්තා සඟරාවල හැරවුම් ලක්ෂයක් ඇති කරන්න ඈ ට හැකියාව ලැබේවා යි කියා මම ඉතසිතින් ප්‍රාර්ථනා කරනවා.
ඇත්තටම අපි අද මේ කතා කරන්න යන මාතෘකාව වඩාත් කාලෝචිතයි කියලා මට හිතෙනවා. මොකද අද වෙන කොට බාල, තරුණ, වැඩිහිටි කා අතරත් කතා බහට ලක්වෙන මාතෘකාවක් වෙලා තියෙන්නේ ජිම්. අපි ජිම් එකකට යන්න කලින් දැනගන්න ඕනේ ජිම් මධ්‍යස්ථානයක් කියන්නේ මොකද්ද කියලා. ඇත්තටම ජිම් එකක් කියන්නේ ශරීර සුවතා මධ්‍යස්ථානයක්. ඒ වගේම තමයි ජිම් එකකට එන අය ළඟ විවිධ අරමුණු තියෙන්න පුළුවන්. ශරීරයේ බර අඩු කර ගන්න, ශරීරයේ මාංශ පේශී වර්ධනය කර ගන්න, ක්‍රීඩා කටයුතුවලට අවශ්‍ය ශරීර යෝග්‍යතාවය පවත්වා ගන්න වගේම රෝග වළක්වා ගැනීම අරමුණු කර ගෙනත් බොහෝ දෙනා අද ජිම් භාවිතා කරනවා. වැදගත්ම දෙයක් තමයි ලෝකයේ වගේම ලංකාවෙත් සියයට අසූවක් පමණ ප්‍රතිශතයක් ජිම් භාවිතා කරන්නේ ශරීරයේ බර අඩු කර ගන්නයි. ඒ නිසා ජිම් එකක් කියන්නේ කායික වගේම මානසික සුවය පවත්වා ගැනීමට අපට උපකාරී වන ශරීර සුවතා මධ්‍යස්ථානයක් කියලා සරලව පෙන්වා දෙන්න පුළුවන්.
ඒ වගේම අද ගොඩක් අයට තියෙන ප්‍රශ්නයක් තමයි, ජිම් එකකට ගියොත් අපිට ලැබෙන ප්‍රයෝජන මොනව ද කියලා. ගොඩක් අය හිතන්නේ ජිම් එකකට කවුරු හරි යන්නේ මංශපේශී වර්ධනය කරගන්න කියලා. ඇත්තටම ඒක සම්පූර්ණයෙන්ම වැරදි අදහසක්. ජිම් එකකින් අපිට ලැබෙන ප්‍රයෝජන වර්ග දෙකක් තියෙනවා. ඒ තමයි කායික වශයෙන් ලැබෙන ප්‍රයෝජනයි. මානසික වශයෙන් ලැබෙන ප්‍රයෝජනයි. ශරීරයේ බර අඩු කර වීම, ශරීරයේ මාංශ පේශී වර්ධනය වීම, ක්‍රීඩා කටයුතුවලට අවශ්‍ය ශරීර යෝග්‍යතාවය පවත්වා ගැනීම වගේම රෝග වළක්වා ගැනීම ජිම් එකකින් අපිට ලැබෙන කායික ප්‍රයෝජන හැටියට පෙන්වන්න පුළුවන්.
ඒත් අද ගොඩක් අය හරියටම දන්නේ නැහැ ජිම් එකකින් මානසික සුවයට ලැබෙන ප්‍රයෝජන මොනවද කියලා. මෙතන දි කියන්න ඕනේ දෙයක් තමයි ලෝකයේ සියදිවි නසා ගැනීම් අතින් ලංකාව ඉහළ ස්ථානයක පවතිනවා. වෛද්‍යවරු පෙන්වා දෙන්නේ සියදිවි නසාගැනීමට බලපාන්නේ මානසික ආතතිය කියලා. ඉතින් ඒ මානසික ආතතිය අඩු කරගන්න ජිම් එකෙන් නැතිනම් ව්‍යායාමයෙන් ලොකු උදව්වක් ලැබෙනවා. ඒ වගේම දවස සතුටින් ගෙවන්න, දවසේ වැඩ ටික හොඳින් කරගන්න, අභියෝගවලට මුහුණ දෙන්න වගේම ආත්ම තෘප්තිය ඇති කරගන්නත් ජිම් එකෙන් ලොකු උදව්වක් ලැබෙනවා. ඒ හින්දා අපි දැනගන්න ඕනේ ජිම් යන එක කරන්නං වාලේ නොකර, හොඳින් දැනුවත් වෙලා ජිම් එකකට යන්න.
මම ඉස්සෙල්ලා කියපු විදියට ජිම් එකකට ගියාම ඒකෙන් අපිට ගොඩක් ප්‍රයෝජන තියෙනවා. ඒ ප්‍රයෝජන ගන්න ඕනේ නම් අපි හරි වයසේ දිම ව්‍යායාම නැතිනම් ජිම් එකකට යන්න පටන් ගන්න ඕනේ. ඇත්තටම ගොඩක් අය මගෙන් අහන දෙයක් තමයි  ජිම් භාවිතා කිරීමට වයස් භේදයක් තියෙනව ද ? කියලා.  සාමාන්‍යයෙන් වයස අවුරුදු 12 න් ඉහළ දරුවන්ගේ සිට ඕනෑම පුද්ගලයෙක්ට ජිම් එකකට යන්න පුළුවන්. මොකද ජිම් එකක දි කරන බර ඉසිලීම් වැනි ව්‍යායාම අවුරුදු 12 න් පහළ දරුවන්ට ගැලපෙන්නේ නැති නිසා , ජිම් එකක් භාවිතා කරන්න හොඳම වයස වෙන්නේ අවුරුදු 12 යි. ඒ වගේම තමන්ගේ ජීවිත කාලය පුරාවමට ව්‍යායාම කිරීම දෛනික පුරුද්දක් විදියට පවත්වා ගෙන යෑම බාල, තරුණ, මහලු කාටත් ප්‍රයෝජනවත් දෙයක් වෙනවා.
අපි දැන් කතා කළා ජිම් එකකට යන්න හොඳම කාලය මොකද්ද කියලා. හොඳම කාලයේ දි අපි ජිම් එකකට ගියත් අපි මුලින්ම අපේ සෞඛ්‍ය තත්ත්වය ගැන සැළකිලිමත් වෙන්න ඕනේ. ජිම් එකක සාමාන්‍ය ක්‍රියාවලිය වෙන්නේ අලුතින් එන පුද්ගලයින්ව ප්‍රථමයෙන්ම වෛද්‍යවරයෙකු ලවා රෝග පරීක්ෂාවකට ලක් කිරීම. ඊට පස්සේ අධික රුධිර පීඩනය, දියවැඩියාව, හෘද රෝග වැනි රෝග තියෙනවා නම් සති තුනක විතර කාලයක් ව්‍යායාමයට අවශ්‍ය ශරීර යෝග්‍යතාවය නිර්මාණය කරලා තමයි  ජිම් එකේ ව්‍යයාම පාඨමාලාවට ඇතුළත් කර ගන්නේ. වැදගත්ම දෙය තමයි, වෛද්‍යවරයෙකුගේ උපදෙස් මත ජිම් එකකට ඇතුළත් වීම. ඒ උපදෙස් අපි හරියටම පිළිපැද්දොත් අපි ජිම් එකකට යන අරමුණ ඉතාමත් හොඳින් ඉටුකරගන්න පුළුවන්.
මම දන්නවා අපේ ඈ පාඨකයන්ගෙන් සමහර අය ජිම් එකකට යන්න ආසාවෙන් ඉන්නේ කියලා. ඒ නිසා ඒ වගේ අලුත් අය දැනගන්න ඕනේ ජිම් එකක ක්‍රියාවලිය කොහොම ද හැදෙන්නේ කියලා. මුලින්ම අලුතින් ජිම් එකකට එකතු වන අයව මූලික වෛද්‍ය පරීක්ෂණයකින් පසුව සති තුනක පමණ කාලයක් ව්‍යායාමවලට ගැලපෙන්න හෘදයේ ක්‍රියාකාරීත්වය පරීක්ෂා කරනවා. ඊට පස්සේ ක්‍රම ක්‍රමයෙන් ශරීරයේ සෞඛ්‍ය තත්ත්වය හා සාමාජිකයාගේ අරමුණ අනුව පළපුරුදු පුහුණුකරුවන් යටතේ ව්‍යායාම වැඩසටහනට යොමු කරනවා. වැදගත්ම දෙයක් තමයි, තමන්ගේ අරමුණ ඉටු වුණාට පස්සේ බොහෝ දෙනා ව්‍යායාම කිරිම නතර කරනවා . ඒක සම්පූර්ණ වැරැද්දක්. මොකද බොහෝ වෙහෙස මහන්සි වෙලා තමන් සාර්ථක කර ගත්තු අරමුණ ටික කාලයකින් නැතිවෙලා යනවා. ඒ නිසා ව්‍යායාමය කියන්නේ මුළු ජීවිත කාලය පුරාවටම පවත්වා ගත යුතු පුරුද්දක්.
අද අපේ සමහර අය දිනපතා ජිම් එකකට එනවා. සමහර අය සුවතා මං තීරුවල ව්‍යායාම කරනවා. තවත් සමහර අය නිවසේ ඉඳන් ව්‍යායාම කරනවා. ඒ වුණාට අපි කරන ව්‍යායාමවලින් අපට ලැබෙන ප්‍රයෝජනය සියයට විස්සක් විතරයි. ඉතුරු සියයට අසූවම තියෙන්නේ ගෙදර මුළුතැන්ගෙයි. තමන් දැනගන්න ඕනේ තමන්ගේ අරමුණට යන්න ඕනේ නම් තමන් තුළ දැඩි අධිෂ්ඨානයක් තියෙන්න ඕනේ කියලා. අපි හැම වෙලාවෙම උත්සහ ගන්න ඕනේ සමබර වගේම නිරෝගීමත් ආහාර වේලක් ගන්න. එළවළු, පලතුරු, ධාන්‍ය වර්ග, කෘමිනාශක භාවිතයෙන් තොර ආහාර, කෙඳි සහිත ආහාර, මුහුදු ආහාර භාවිතයට ගැනීම වැදගත් වෙනවා. ඒ වගේම තමයි අපි සමහර ආහාර පුරුදු අතාරින්න ඕනේ. ෂෝර්ට් ඊට්ස්, නූඞ්ල්ස් , සත්ත්ව මේදය සහිත ආහාර වැනි ක්ෂණික ආහාර භාවිතයෙන් මුළුමනින්ම වැළකීමට අපි වග බලාගන්න ඕනේ. ඒ වගේම තවත් වැදගත් දෙයක් තමයි දිනකට වතුර ලීටර් 7 ක් 8 ක් විතර පානය කරන්න අවශ්‍ය වෙනවා, වගේම පැය අටක පමණ නින්දයක් අනිවාර්්‍යයෙන්ම ලබා ගන්න ඕනේ. ලෝකේ තියෙන හොඳම ජිම් එකක, හොඳම පුහුණුකරුවන් ළඟ කුමන ආකාරයේ ව්‍යායාමවල නිරත වුණත් ආහාර පාලනයක් තමන් ළඟ නැතිනම් තමන්ගේ අරමුණ ඉටු කරගන්න බොහෝම අසීරු වෙනවා. ඒ නිසා අපි දැනගන්න ඕනේ අපේ ව්‍යායාමයේ දි ආහාර පාලනය වැදගත් දෙයක් වෙනවා කියලා. කොහොම වුණත් ජිම් එකක දි ව්‍යායාම වගේම නිවැරදි ආහාර පාලන ක්‍රමවේදයන් ගැන උපදෙස් දෙන නිසා ජිම් එකක් භාවිතා කරන එක අපි කාටත් වැදගත් දෙයක් වෙනවා. ඒත් ව්‍යායාම කරන්න ජිම් එකක් අවශ්‍ය වෙන්නෙම නැහැ. තමන්ට පුළුවන් විදියට ඇවිදින්න, දුවන්න පුළුවන් නම් හැමදාම ඔබට හොඳ ව්‍යායාමයක් ලබා ගන්න පුළුවන්. ඒ වුණාට ජිම් එකකට ගියාම අපිට අලුත් ව්‍යායාම ඉගෙන ගන්න වගේම හොඳ සේවයක් ලබා ගන්න පුළුවන්. අපිට ලැබෙන ඒ සේවය හින්දා අපේ අරමුණ හොඳින් ඉටුකරගන්න පුළුවන්.
අපි ලබන මාසයෙත් හමුවෙන බලාපොරොත්තුවෙන් මට කියන්න තියෙන්නේ, තමන්ට පැහැදිලි අරමුණක් තිබීම ව්‍යායාමයේ දි වැදගත් වෙනවා. නිරෝගීමත් ජිවිතයකට මත්ද්‍රව්‍ය භාවිතයෙන් තොර වීමත් වැදගත් වෙනවා. මත්ද්‍රව්‍ය භාවිතය නිසා ශරීරයේ ඇති වන විස නැති කිරීමට ව්‍යායාමයට හැකියාවක් නැහැ. ඒ නිසා අනිවාර්්‍යයෙන්ම මත්ද්‍රව්‍ය භාවිතයෙන් තොරවීම මෙහිදි වැදගත් වෙනවා. ඒ වගේම තැන කොතැන වුණත් තමන්ගේ හිතේ තියෙන අධිෂ්ඨානය අනුව ව්‍යායාමයේ නිරත වීම වැදගත් වෙනවා. කොච්චර කාර්යය බහුල වුණත් ව්‍යායාමයට වේලාවක් වෙන් කරගෙන ජිවිත කාලය පුරාවටම පුරුද්දක් හැටියට ව්‍යායාමය පත් කර ගන්න ඈ පාඨක අපි අධිෂ්ඨාන කරගන්න ඕනේ. ඒ නිසා අධිෂ්ඨානයෙන් යුතුව කැපවීමෙන් ව්‍යායාමයේ නිරත වුණොත් සාර්ථක ප්‍රතිඵල ලබා ගැනීමට හැකි වෙනවා. මේ විදියටම අපි ලබන මාසයේදීත් ව්‍යායාම ගැන ඔයාව දැනුවත් කරන්න බලාගෙන විරාමයක් තියෙනවා. මතක තියාගන්න ඕනේ මේ විරාමය ඔබේ ජීවිතයේ නිරෝගීමත්කම වැඩි කරන, සතුට ගෙන එන කාලයක් කරගන්න ඔයා සැළකිලිමත් වෙන්න ඕනේ කියලා.