ශ්‍රී ලංකාවේ ආගමික සන්නිවේදනය උදෙසා මුද්‍රිත මාධ්‍යයේ දායකත්වය
ලංකාවේ බි්‍රතාන්‍ය අධිරාජ්‍යවාදයත් සමඟම ආරම්භ වන පුවත්පත් කලාව, ලංකාවේ එවකට පැවති දේශපාලනය, සමාජය සහ ආර්ථිකය යන කාරණා සමඟ ඍජුව බැඳී පැවතුණි. බි්‍රතාන්‍ය පාලන සමයේ දී ආරම්භ වන පුවත්පත් කලාව සුවිශේෂී වෙනස්කම් රැසකට භාජනය කරනු ලබන්නේ 1860 දී ආරම්භ වන ලංකාලෝකය පුවත්පතයි. ඉන් ආරම්භ වන ලාංකේය පුවත්පත වර්තමාන පුවත්පතේ ආකෘතියට වඩා සම්පූර්ණයෙන්ම වෙනස් වූයේය. එයට බලපෑ ප්‍රධාන සාධකය වන්නේ 19 වන සියවසේ මෙරට ඇති වන ආගමික ශාස්ත්‍රීය පුනරුද ව්‍යාපාරයයි. 1860 දී ආරම්භ වන ලංකාලෝකය පුවත්පතේ අන්තර්ගතය තුළ වඩාත් කැපී පෙණුන සාධකය වන්නේ ආගමික කරුණු පාඨකයා වෙත ගෙන ඒමයි. එතැන් සිට ආරම්භ වන ලාංකේය මුද්‍රණ කර්මාන්තයේ මුහුණුවර ආගමික මුහුණුවරකට වෙනස් වන්නට මුල පිරී ය. පුවත්පත් හා සඟරා ඉතිහාසය පිළිබඳ කලුකොදයාවේ පඤ්ඤාසේකර හිමියන් දක්වන ආකාරයට මෙරට ආගමික සන්නිවේදන ව්‍යාපාරයෙහිලා මූලික වශයෙන් දායක වු පළමු මුද්‍රිත මාධ්‍ය වන්නේ සඟරා ය. කලුකොදයාවේ පඤ්ඤාසේකර හිමියන් සිය පුවත්පත් සඟරා ඉතිහාසය ග්‍රන්ථ වෙළුම් තුළ දී මෙරට පවතින ආගමික පුවත්පත් හා සඟරා පිළිබඳ දක්වන සංක්ෂිප්ත විශ්ලේෂණය සහ පසුකාලීනව මහාචාර්ය සඳගෝමී කෝපරහේවා දක්වන පර්යේෂණ මෙහිදි සිදු කරනු ලැබූ ශාස්ත්‍රීය පර්යේෂණයන් වෙති.
ආගමික පුවත්පත් වශයෙන් ඍජුව පුවත්පත් ඉතිහාසයේ දී හමුවන පුවත්පත් එසේ නම් නොකළ ද ඒවායෙහි අන්තර්ගතය අනුව එම පුවත්පත් ආගමික පුවත්පත් වර්ගීකරණයට ලක් වෙයි. මුල් යුගයේ දී එනම් 19 වන සියවසේ දී ආරම්භ වන සිංහල පුවත්පත් ඉතිහාසය මුළුමනින්ම මතු වන්නේ ආගමික පුවත්පත් තුළිනි. එබැවින් මෙරට පුවත්පත් ඉතිහාසයෙන් ආගමික පුවත්පත් වෙන් කර දැක්වීම අපහසු කරුණක් වන බැවිනි. මූලික වශයෙන් බෞද්ධ, ඉස්ලාම් හා හින්දු ආගම් මුල් කරගනිමින් ආරම්භ වන ආගමික පුවත්පත් කර්මාන්තය සීඝ්‍ර වශයෙන් 19 වන සියවසේ දී ව්‍යාප්ත වුව ද 21 වන සියවස වන විට ආගමික පුවත්පත් කර්මාන්තය අභාවයට ලක් වන ආකාරය හඳුනාගත හැකිය. 19 වන සියවසේ ඇති වු ආගමික ශාස්ත්‍රීය ප්‍රබෝධයට මුල් වු මුද්‍රිත මාධ්‍ය අද වන විට පවතින්නේ පසුගාමී මට්ටමක ය.
මෙම පර්යේෂණයේ දී ලංකාවේ 19 වන සියවසෙන් ආරම්භ වූ ආගමික පුවත්පත් කර්මාන්තයේ ආගමනය 20 වන සියවස හරහා 21 වන සියවසේ පවතින ස්ථානය අධ්‍යයනයට ලක් කෙරේ. ප්‍රධාන වශයෙන්ම පුවත්පත් මාධ්‍ය සමාජයේ ප්‍රතිරූපයක් වන බැවින් 19 වන සියවසේ සමාජ නිරූපණය මුල් යුගයේ පුවත්පත් තුළින් ද 21 වන සියවසේ සමාජ නිරූපණය නූතන යුගයේ පුවත්පත් තුළින් ද විදහා දැක්වෙයි. 21 වන සියවස වන විට ප්‍රධාන තලයේ පවතින ආගමික පුවත්පත් තුළින් නිරූපණය වන සමාජමය තොරතුරු වාර්තා කිරීම සිදු වන්නේ පවතින ආගමික මතවාදයන් මත භේදයන්ට ලක් කරමිනි. පුවත්පත් මෙන්ම සඟරාවන් තුළින් සිදුවන ආගමික සන්නිවේදන කාර්යයේ දී එහි සාර්ථකත්වය 19 වන සියවස සහ 21 වන සියවස අතර සංසන්දනාත්මකව විශ්ලේෂණය කිරීම කාලෝචිත ය.
No comments:
Post a Comment